Miq e dashamirës,
thirrjes së Fondacionit Albana për bashkëpunim e organizim iu përgjigjën edhe shqiptarët e Londrës. Pas disa takimesh paraprake me patriotë që banojnë në Londër, Fondacioni Albana shpall hapjen e degës së re. Kjo është dega e dytë e Fondacionit në Europë, pas asaj të hapur në Romë, më 28 korrik.
Në takimet e zhvilluara me shqiptarët e Londrës, u trajtuan çështjet e rëndësishme, si gjendja e krizës së thellë ku gjendet Shqipëria, fundi i së cilës nuk duket askund apo çështja kombëtare, të cilës politika i punon vazhdimisht kundër.
Po ashtu vend të rëndësishëm zunë problemet e emigracionit në përgjithësi; vota e emigracionit, shkollat shqipe, dokumentet etj, si dhe në veçanti ato të komunitetit shqiptar në Angli, tashmë që Anglia do të dalë prej Bashkimit Europian.
Shqiptarët e Londrës shprehen besimin e plotë tek Fondacioni Albana, tek qëllimet, platformat dhe nismat që kemi ndërmarrë, duke pranuar të jenë pjesë e projektit të përbashkët dhe të punojnë bashkarisht për përmbushjen e qëllimeve dhe synimeve të Fondacionit.
Ju lumtë Londra !
Miq, ky është një premtim i mbajtur; ne do të jemi përkrah çdo shqiptari, çdo grupimi e çdo shoqate patriotike që dëshiron bashkëpunim të sinqertë, qoftë si aleatë e qoftë si bashkëudhëtarë nën emrin e Fondacionit Albana.
Shënim: fotot janë bërë në Inverness Tarrace, ku gjendet busti i Heroit Kombëtar, Gjergj Kastrioti Skënderbeu